Rahajeng semeng
Putu Diah Kesuma Dewi
girang bakal masuk sekolah
Tuuhné suba petang tiban
jani ia bakal masuk TK
di sekolah TK Widia Jayantara
semengan méméné mayasin pianakné
aji pakian seragam
celana gadang, baju putih misi rompi gadang
ngandong tas sekolah lan botol téh
lantas atahina tekén bapané
mémé bapané suba pepes ngorahin
apang pianakné bisa ngorahang rahajeng
semeng
ajak om swastiastu
lantas teked di sekolahan
muridé mabaris di diapan kelasné
mémé bapan muridé nongosin disampingné
makejang muridé sambata adané tur takonanga
adan mémé bapané
lantas
Putu Diah Kesuma Déwi sambata
bapané makenyem disampingné
Putu Diah girang majalan kaarep
Om Swastiastu
Rahajeng semeng Bu Guru
lantas Bu Guru nimbal masahut
Om Swastiastu, Rahajeng semeng gég
Aéng girang kenyem bapané disampingné
Sira peséngané?
Tiang Putu
Diah Kesuma Dewi
uling dija?
masahut Putu girang
Tiang uling Lodtungkang
sira peséngan bapak gégé?
Bapak tiangé Drs Gede Lodra
napi karyan bapaké?
Bapak tiangé ten makarya ngoyong duén jumah
prajani maklieb muan bapané disampingné
suba nem tiban ia nganggur sing maan ngalih
gaé
tuah nulungin luhné madagang nasi bungkus
ajak godoh
Bu guru nandan Putu Kesuma Dewi ka kelasé.
Bapané mapandus peluh.
Pondok Tebawutu
25 Januari 2009
pamargin Ida
barak sumeriak nguak sang nrudu
nanjak atapak-tapak nyibak sang kala
kanti nuntung tepet
macepol alon
nuju laju angalayang nandang
ka bibih pasih lan ambara
alon tedun ka pakoleman
barak sumeriak anapak-napak
nanjek pedek
ngruak rangki pakoleman
kidung ombak nandak layak-layak
ngiring pamargin ida sang Hyang Baskara
Dipati
anglila kayun malantun-lantun
karena benjang malih medal
masolah singsal kendal
lantas malih masineb
nyungkemin jagat dahat tan mapegat.
-
Pondok Tebawutu
25 Januari 2009
Ada anak nyangkil anak cenik
bajuné dekil
awakné dekil
matengkuluk dekil
nyangkil
anak cenik dekil
makejang dekil
nanging abesik
ané sing dekil
sabilang anak léwat
paningalané galang
munyiné
ngeres
terang
tiang nunas
uling puan
tiang makenta
pianak ané sangkila makenyem
yén ada anak mang pipis
yén kéné ia sing dekil
-
Pondok Tebawutu
25 Januari 2009
di bale Banjar
sabilang suba nyaluk
sanja
salikaon
sada saru gremeng
sawang-sawang
suba makumpul anak
idih-idih
ané uling semenan malinder
natakang lima
tiang nunas
jani sale kaon
ia makumpul di bale
Banjar
ngantos montor pikup
doplang
nuduk
baas
anak ané malindr
ada tukang ngepulné
ada duén gaén nyamané
gaé
sekeha
idih-idih.
-
Pondok Tebawutu
25 Januari 2009
suara saking gerémbéng jurang
jero
singké jero marasa
sangkaning jurang gerémbéng
jurang
gerémbéng
nyelamtang jero
saking blabar
makejang paican
toyané
magerus
ka
jurang
gerémbéng
tan wénten toya
maumbyar ka marginé
singké jero marasa
nyelamtang jero
saking blabar
jani
dadi hati
jero nancebang tiang
beton
di jurang gerémbéng
ngawangun umah
dadi kené rakus jeroné
sing pesan matolihan
nang abedik
-
Pondok Tebawutu
25 Januari 2009
-
Buin pidan ada anak nyatua
Sing tawang buka jani kakéné guminé
Tiang sing nawang ada gending béro sing
masuling
Ada anak ngigel sing matanjek
Tutur dipajongkokan ngancan ramé sing
matutuk mabongkol
Sing ada karuan undukné
Ulah pesu karena makelo pesan suba ngioyong
di tengah
Sing ada ajak nyatua
Karena guminé sing ada ané nyandaang
satuaang di suungé
Karena makejang pada ngaba surat kajang
Ngalih unduk tongosné di kedituané suung
-
Tidak ada komentar:
Posting Komentar